sábado, 27 de fevereiro de 2010

ORGULL@S DO NOSO, ORGULLOS@S DO GALEGO.



Unha nova campaña da Coordinadora de Equipos de Normalización, na que interveñen figuras con proxección como Martín Rivas ou Luís Tosar, está a colleitar un éxito sen precedentes. O vídeo Orgullos@s do galego achégase, catro días despois do seu lanzamento, ás 18.000 reproducións no Youtube e máis de 1000 visualizacións directas en Vimeo, que non contabiliza as reproducións embebidas noutros sitios na rede. Tamén está a ter un seguimento importante nas redes sociais con case 2000 seareiros nun grupo en Facebook e máis de 5000 mozos e mozas que participan nun evento no Tuenti.
Alén deste impacto mediático, trátase dunha campaña social: aberta á participación de toda a comunidade educativa, pon á nosa disposición diferentes materiais para imprimir e distribuír, e ademais calquera pode achegar os seus propios.

Esta campaña é túa, esta campaña é de todos e de todas. Colabora connosco e grava un spot, unha breve historia, unha declaración... mostrando o teu orgullo polo noso, o teu orgullo polo galego. Que non sabes como expresalo? A creatividade está dentro de ti. Aí tes o lema, os vídeos, a idea... e dálle voltas, faina túa, falade no colexio ou no instituto, cos profes e cos compas... e mostra o teu orgullo polo noso, o teu orgullo polo galego.


Recollida desta boa recepción n'A Nosa Terra.
Noticia da campaña en Certo.

Velaquí a presentación:




PREPARANDO O 21 DE MARZO: Día da poesía.ENCHAMOS GALIZA DE POESÍA!


Como xa sabedes o 21 de Marzo é o día da Poesía. Dende o Equipo de Innovación en Normalización facemos dúas propostas:

PROPOSTA 1.

- Cada neno/a e mestre/a escollerá un poema que lle guste en galego ou portugués (tedes a recopilación sobre o mar feita pola mestra Rosa na biblioteca, ou tamén podedes coller do autor das letras galegas de Uxío Novoneyra, ou de quen desexedes).

- Fotocopiade o poema e lle poremos un fio, lá…para colgar o poema no sitio que se desexe do colexio: pode ser dentro ou fóra, pode ser nas aulas, nos pasillos, nos baños, nas escaleiras…no patio, nas árbores…cada quen onde desexe.

- Colgarase o Martes 23 de Marzo no Recreo. Os que vaian caíando durante a semana recolleranse para manter limpo o entorno.

PROPOSTA 2.

- Para a volta de semana santa, gravaremos a xente que desexe recitando un poema enteiro, so unha estrofa, so un verso…como desexe.

- Gravarase en distintos sitios do colexio para facer unha montaxe: nos columpios, nas escaleiras, no armario de limpeza, debaixo dunha mesa, dentro dunha papeleira…cada quen onde desexe. Así que escollede poema e lugar. Poden participar todo o alumnado que desexe facendo as gravacións nos recreos e o profesorado que o desexe facendo as gravacións un martes que acordemos pola tarde. Pode ser grupo, por parellas, individualmente….

Estas dúas propostas tamén se farán ós centros que están no proxecto de poesía experimental de Redeiras e ós centros que están na Coordinadora de Equipos de Normalización da Barbanza, podedes decirllo a xente doutros colexios que coñezades, deste xeito…encheremos Galiza de poesía!!!!!!!!!!!!!!!!!!!!!!!!

A mestra Ana pintounos a Xandre, un elefante galego.








ANIMÁDEVOS A COÑECER A XANDRE:
Xandre.

8 DE MARZO: Día da Muller Traballadora. No Ceip de Aguiño faremos MESAS -COLLAGES DE MULLERES GALEGAS.




Como xa sabedes o 8 de Marzo celébrase o día da Muller traballadora, dende o Equipo de Normalización relacionado co proxecto de Innovación “Mar de Mulleres Asolagadas” propoñemos que fagamos durante o mes de Marzo (non ten que ser xusto para o día 8 de Marzo) “mesas-collages” adicadas a “mulleres traballadoras galegas en distintos oficios”. Consiste en coller unha mesa (pode ser das que tedes en clase,no almacén...) e facer unha especie de collage con fotos, debuxos, obxectos …sobre un determinado oficio. Por exemplo a mesa dunha: informática, a mesa dunha doutora, a mesa dunha ama de casa, a mesa dunha mestra, a mesa dunha bombeira, a mesa dunha percebeira…Estas mesas sacaranse ó pasillo para facer unha exposición en todo o centro. Na mesa de pinpong faremos unha “mesa collage colectiva” dunha poetisa. Cada mestre/a, alumnado…pode fotocopiar poemas en galego ou portugués que lle gusten, obxectos que relacionaría cunha poetisa e pode ir poñéndoos na mesa de pingpong.
As “mesas-collages” podese facer por titorías, por ciclos, por especialistas…cada quen como desexe.

quarta-feira, 24 de fevereiro de 2010

ORGULLOS@S DO NOSO, ORGULL@S DO GALEGO.


CAMPAÑA DA COORDINADORA GALEGA DOS EQUIPOS DE NORMALIZACIÓN E DINAMIZACIÓN LINGÜÍSTICA.
"Benvida, benvido. Este é un espazo onde queremos mostrar o orgullo que temos os galegos e as galegas pola nosa lingua. Sexa cal sexa a cor da nosa pel, onde naceramos, de quen veñamos sendo, ou se nos gusta máis a lúa ou o sol, somos moitos e moitas os que estamos orgullosos de termos unha lingua propia. Aquí encontrarás videos, materiais para imprimir e distribuír como queiras, cando queiras e con quen queiras, e moitas, moitas persoas coma ti que presumen da nosa lingua, do galego."

Dende os mares do audiovisual internacional chega Bob con moitas ganas de coñecer a seres galegos.


domingo, 14 de fevereiro de 2010

A comunidade educativa do Barbanza mostra o seu rexeitamento ó borrador do Decreto do galego.




Este mércores, día 10 de febreiro de 2010, a Coordinadora de Equipos de Normalización e Dinamización Lingüística do Barbanza celebrou unha rolda de prensa no IES Nº1 de Ribeira, onde contou co presenza de perto de setenta nais/pais, alumnado e profesorado de centros de infantil, primaria e secundaria (tanto do ensino público, como do concertado) de Rianxo, Boiro, A Pobra e Ribeira.
Na Coordinadora de ENDL do Barbanza indicaron que durante estes últimos meses tiveron multitude de preguntas e queixas polo feito de que desde a Consellería de Educación se quixese facer retroceder a lingua galega no ensino.
Por este motivo a CENDLB quixo que foran directamente os implicados no ensino os que ofreceran o sentir maioritario da comunidade educativa do Barbanza.
No acto interviñeron varios membros de distintos colectivos (ANPAS, alumnado e profesorado) que centraron as súas intervencións nos graves prexuízos contra o galego deste “Borrador” nos seguintes puntos:
-Un retroceso do galego por primeira vez desde que temos democracia, obviando toda a lexislación vixente, incluído o Estatuto de Autonomía que obriga ao goberno galego a protexer e fomentar a nosa lingua.
-O galego non está normalizado, polo tanto está en desigualdade co castelán e só através dunha presenza ampla no ensino (mínimo do 50% das materias) se pode ir cara un maior equilibrio.
-Úsase o introdución do inglés como coartada para facer retroceder o galego, nós non temos nada contra as demais linguas, pero hai outras maneiras de fomentar o plurilingüísmo sen facer retroceder o galego, que a nosa lingua propia e lingua tamén oficial.
-Se se leva a cabo este borrador de decreto, provocará un FRACASO ESCOLAR maior aínda, xa que moitos nenos e nenas non poderán seguir as clases con normalidade
-Ao mesmo tempo provocará moitos conflitos entre familias e docentes, só pola deixación de funcións da administración, que é quen ten que fixar todo o currículo educativo.

Por todo isto, manifestaron unanimemente o rexeitamento da comunidade educativa do Barbanza a este borrador do Decreto e manifestaron o seu desexo de poderen continuar como até agora, pois non tiveran ningún problema coa actual situación.


Así foi recollido o acto por Canal Rías Baixas:





A nova, con máis imaxes, en Certo.

segunda-feira, 8 de fevereiro de 2010

Obradoiro de disfraces-bolboretinas das familias de Educación Infantil. Moitas grazas a todos/as!



Chega o entroido. Seguindo co proxecto de Innovación en Normalización os disfraces terán como eixo temático:SERES FANTÁSTICOS DOS MARES GALEGOS.

EDUCACIÓN INFANTIL:

O curso pasado fumos disfrazados/as de seres reais do mar:polbos,percebes...este curso iremos de seres fantásticos dos mares galegos. En Educación Infantil, eleximos o relato das BOLBORETINAS.

As atadoras (reideras) de Aguiño, contan que as noites de lúa chea cheísima, se o vento pasa por dentro dunha buguina, aquelas cunchas que están unidas enriba da area das praias de Aguiño, convírtense en bolboretinas. Bolboretinas que sairán voando. Non é fácil distinguir as bolboretas de terra das bolboretinas de mar. Tede moito coidado, son moi fráxiles!





E rematou a semana da Candeloria...e o amor queda nas cores do colexio.





Presentación en Ribeira da obra 55 mentiras sobre a lingua galega.




55 mentiras.

Ás 8 e media da tarde comezaron as presentacións en todas as cidades e as principais vilas de Galicia, así como noutras localidades do estado español que quixeron sumarse a este acto histórico, ben en territorios nos que se fala o galego como Lubián (Zamora), Vilafranca do Bierzo ou San Martiño de Trebello (Val do Ellas, Extremadura), ben en cidades nas que viven galegos orgullosos de defender a súa lingua, como Barcelona, Madrid, Ponferrada, Trintxerpe (Guipúzcoa) ou Vitoria/Gasteiz. Pero tamén se presentou 55 mentiras sobre a lingua galega, axustándose ás diferenzas horarias, en lugares do mundo tan distantes no espazo como Bethelem (Palestina), Bos Aires (Arxentina), Bruxelas (Bélxica), Copenhague (Dinamarca), Corcaigh/Cork (Irlanda), Lisboa (Portugal), Londres (Gran Bretaña), Madison (Wisconsin, EEUU), Nablús (Palestina), Nova York (EEUU), París (Francia), Saraievo (Bosnia) ou Tübingen (Alemaña).

terça-feira, 2 de fevereiro de 2010

segunda-feira, 1 de fevereiro de 2010

Dios ke te crew - Deitado frente ao mar.

O amor pola lingua...

Noites de voda. Joaquín Sabina.

Seguimos buscando AMOR...

Letras de amor: Nanas de Cebolla de Miguel Hernández.

Buscamos AMOR en poemas, en cancións...

2 de Febreiro: Día da Candeloria. Festa do amor en Galiza!



A CANDELORIA (por Luís Amado Carballo)

Na catedral do abrente
oxe cásans' os paxaros,
con nubens de neve e ouro
está o ceo galanado.

Ficou o día ancorado
na ría donda do ceo.
Os roibens soben no lonxe
como rosarios d' encenso.

O xantar do casamento,
roibo, na palma da man
das eiras madrugadoras
xa está arranxado no val.

Vai tocando pol-o campo
a sua zanfona o rego
e canta o vento nas farpas
sonorosas dos piñeiros.

O campo as montanas ruzas
envolve en capa pluvial
co hisopo do sol mollado
dalles a beizón nupcial.

Do casebre nugallán
soben os vivas dos galos
e na festa d' esta noite
estrena un luar o campo.


Algúns refráns relacionados:

•A partir da Candeloria, ningunha ave voa soa
•Cando a Candeloria chora, metade do inverno vai fora
•Pola Candeloria a metade do inverno vai fóra, se chora ou venta, aínda entra
•Se a Candeloria chora, o inverno vai fora. Se ri, o inverno quere vir
•Cando a Candeloria chora, medio inverno vai fóra; que chore, que deixe de chorar, a metade do inverno está por pasar.